09 февраля 2021, 19:08

Сэсэгма Гармаева. Сагаалдаг һайхан заншал

 

Буддын номгон шажантай
Буряад манай араднай
Сагаан һараяа угтажа,
Сагаалдаг һайхан заншалтай.

Багахан үхибүүн наһандаа
Бүтүү үдэртэ дурлахаш,
Бууза хэжэ дууһахада,
Болохыень хүлеэжэ ядахаш.

Хойто үдэрынь болохо,
Хабатай һонин байха:
Улад зон олоороо
Үдэрөө дүүрэн орохо.

Аха хүнүүдээ хүндэлэн,
Амар мэндые хүсэхэ.
Уг узуураа уудалан,
Угаа удаан хөөрэлдэхэ.

Адуу мал тухайгаа
Аятай зугаа дэлгэхэ:
Буруунай булшан, дааганай далан —
Бултыень яаралгүй хэлсэхэ.

Зугаа, хөөрөө шагнан,
Зөөлэн бүхэдэ диилдэхэш.
Далан ехэтэй дааган
Дүтэлэн ерэхэ хажуудаш…

Сэсэгма Гармаева

Уран хүн

Поделиться:

Автор:

comments powered by HyperComments